જુલાઈ-૨૦૧૭ની ફિલ્મો અને પુસ્તકો

જુલાઈ-૨૦૧૭ની ફિલ્મો અને પુસ્તકો

તો આ મહીને સારી એવી ફિલ્મો જોવાઈ છે અને ઘણા લાંબા સમયથી ચાલતી એક નવલકથા અને એક બીજું પુસ્તક વંચાયું છે. ટૂંકમાં, મહિનો સફળ રહ્યો છે.

  1. NIGHT CRAWLER (2014) (ENGLISH) : 7.5/10

મીડિયાની ન દેખાયેલી બાજુ અને તેના વિષે સચ્ચાઈ બયાન કરતી ફિલ્મ. ખાસ તો  Jake Gyllenhaal માટે જોવામાં આવી. અંત એકદમ સચોટ છે. જોકે જેટલી વખાણવામાં આવેલી છે તેટલી રસપ્રદ ન લાગી.

  1. KONG:SKULL ISLAND (2017) (ENGLISH): 8/10

પીટર જેક્શનની ‘કિંગ કોંગ (૨૦૦૫) આલાતરીન ફિલ્મ હતી. KONG:SKULL ISLAND  તેના જેટલી રોમાંચક ફિલ્મ નથી. જોકે અવનવા લોકેશન્સ અને કેરેક્ટર્સ જેવા કે મોજીલો સૈનિક John C. Reilly અને સનકી Samuel L. Jackson મજા કરાવે છે.

  1. THE DARJEELING LIMITED (2007) (ENGLISH) : 7.5/10

માતા કે ખબર નહિ શેની શોધમાં ત્રણ અમેરિકન ભાઈઓ પહેલા ટ્રેન અને પછી વિવિધ રીતે ભારતભરમાં નીકળી પડે છે. તેમની સફર, તેમના સંબંધો અને વચ્ચે વચ્ચે આવતા વિવિધ સ્થળો અને કીરદારો. જોકે ફિલ્મ ખાસ તો ડીરેક્ટર Wes Anderson અને Owen Wilson માટે જોવામાં આવી.

  1. RESIDENT EVIL:THE FINAL CHAPTER (2016) (ENGLISH) : 7.5/10

જોમ્બી ફ્લીક્સ મને ગમે. એમાય ‘રેસીડેન્ટ એવિલ’ તો મજા કરાવે છે. જોકે મને તેનો ત્રીજો ભાગ RESIDENT EVIL: EXTINCTION (2007) સૌથી વધારે ગમેલો. પછીના બધા ભાગ ઠીકઠાક હતા. આ કહેવાતો છેલ્લો ભાગ છેલ્લા બે ભાગની સરખામણીમાં રસપ્રદ છે.

  1. COURT (2015) (MARATHI) : 8/10

આપણી ન્યાય પ્રણાલી અને તેના દ્વારા થતો વહીવટ. એક યુવાન વકીલ જેને પોતાના અસીલને કોઈ પણ ભોગે છોડાવવો છે, એક પીઢ સ્ત્રી જે કોર્ટમાં એકના એક ચહેરા જોઇને કંટાળી જાય છે જેથી તેને પણ કેસ જલ્દી પતાવવો છે અને આ બધામાં ફંગોળાતો આરોપી. નાની લાગતી વાત પણ કોર્ટમાં કેટલી મોટી લાગે છે. ફિલ્મમાં ઝીણી ઝીણી એટલી બાબતો દર્શાવાઈ છે (જેમકે કોર્ટમાં ઝોંકા ખાતો વકીલ કે જજની બાજુમાં બેસીને મોબાઈલ ફંફોસતી ક્લાર્ક) કે ઘણી વાર એમ લાગે છે કે તેની શી જરૂર હશે? જોકે ઓવરઓલ જોતા ફિલ્મનો સંદેશ કે હાર્દ કહેવા માટે તે જરૂરી છે. અમુક સીન્સમાં તો આપને જાણે કોર્ટમાં બેઠા હોઈએ તેવું લાગે છે. ફિલ્મ ધીમી છે પણ અસરકારક છે.

  1. THE SHALLOWS (2016) (ENGLISH) : 7/10

એક એવરેજ સર્વાઈવલ મુવી. જોકે અહિયાં ‘ડીપ બ્લુ સી’ જેવી ધમાચકડી નથી અને રીયાલીટી પર વધારે ભાર મુકાયો છે. શરૂઆતના સમુદ્રના દ્રશ્યો અદભુત છે.

  1. ENTERTAINMENT (2014) (HINDI) : 4/10

નાના છોકરાઓને મજા આવે તેવું બાકી છેક છેલ્લે સુધી કંટાળા જનક. જોકે ફિલ્મો અને કલાકારોના નામ જોડીને બનાવાયેલા અને કૃષ્ણા અભિષેકને મોઢે કહેવાયેલા અમુક વનલાઈનર્સ સારા છે.

  1. HAPPY BHAG JAYEGI (2016) (HINDI) : 7.5/10

ભૂલથી પાકિસ્તાન પહોચીને ત્યાં ધમાચકડી મચાવતી હેપ્પી અને તેને લીધે હેરાન થતું ભારત અને પાકિસ્તાન. સ્ટોરી સારી છે અને કદાચ વધુ મજેદાર બનાવી શકી હોત. અભય દેઓલ, પીયુષ મિશ્રા, જીમ્મી શેરગીલ અને ડાયના પેન્ટી એકદમ સરસ છે. જીમ્મી શેરગીલનું કેરેક્ટર તો ‘તનુ વેડ્સ મનુ’ને મળતું આવે છે. ગીતો અને સંગીત પણ સુરીલું છે. ટૂંકમાં મજા કરાવી દે તેવી ફિલ્મ છે.

  1. MERE DAD KI MARUTI (2013) (HINDI) : 7/10

ભૂલથી ખોવાઈ ગયેલી પપ્પાની મારુતિ અને તેને શોધવા થતી દોડાદોડ. રામ કપૂર, પ્રબલ પંજાબી અને સાકીબ સલીમનો અભિનય સરસ છે. જોકે ફિલ્મમાં વધુ પડતા પંજાબી ડાયલોગ્સ ઘણીવાર ખુંચે છે.

  1. WARCRAFT (2016) (ENGLISH) : 7.5/10

લોકપ્રિય ગેમ પર આધારિત ફિલ્મ. બે જૂથો (ઓર્ક અને માનવો) વચ્ચે દુશ્મનાવટ અને સંબધો પર રચાયેલી ફેન્ટસી ફિલ્મ. સ્ટોરી સરળ અને સ્પેશિયલ ઈફેક્ટસ સરસ છે. ટૂંકમાં એક ટાઈમપાસ ફેન્ટસી ફિલ્મ.

પુસ્તકો:

  1. LET’S RACE, DADDY! (ENGLISH)

Writer: Soham Shukla

આ પુસ્તકનું વિમોચન અમારા વિદ્યામંદિર કેમ્પસમાં થયું હોવાથી અને લેખક પોતે વિદ્યામંદિરના વિદ્યાર્થી હોવાથી પુસ્તક વિષે થોડી ઇન્તેજારી હતી. લેખક પોતે દોડવીર છે અને દોડવીર બન્યા પહેલા અને તે પછીની વાતો રસપ્રદ રીતે એક વાર્તાના રૂપમાં કહેલી છે. જોકે દોડવું એ મારો વિષય નથી પણ દોડવીર બનવામાં જેમને રસ છે તેમને લેખકના અનુભવો અને બીજી ટીપ્સ કામ લાગી શકે તેમ છે.

મારી સાથે સ્કુલમાં ભણતો મિત્ર કાર્તિક પણ ઘણું દોડે છે. અને બ્લોગ વિશ્વમાં ઘણા સમયથી સક્રિય છે.

https://kartikm.wordpress.com/

  1. આખેટ (ગુજરાતી)

લેખક: અશ્વિની ભટ્ટ

છેલ્લા ૬ મહિનાથી ચાલતી અને ત્રણ તોતિંગ ભાગમાં લખાયેલી આ નવલકથા વાંચવામાં ખરેખર દમ નીકળી ગયો. પહેલા બે ભાગમાં મજા આવી પણ છેલ્લો ભાગ થોડો ખેચ્યો હોય તેવું લાગ્યું. જોકે અશ્વિની ભટ્ટની નવલકથાઓમાં એટલું બધું વર્ણન હોય છે કે વાંચતી વખતે એવું લાગે કે જાણે દ્રશ્ય આપણી આંખ સામે જ ભજવાઈ રહ્યું હોય. તેમની નવલકથાઓ પરથી ફિલ્મ બનાવનારને પટકથા લખવામાં ઝાઝી મહેનત ન કરવી પડે. જોકે કોઈ ફિલ્મ બનાવતું કેમ નથી તે આશ્ચર્યનો વિષય છે. ‘આશ્કા માંડલ’ પરથી તો ફિલ્મ બનવી જ જોઈએ. હવે, અશ્વિની ભટ્ટની ‘ઓથાર’ વાંચનના વીશ લીસ્ટમાં છે.

Advertisements

મે-જુન-જુલાઈ-૨૦૧૬ની ફિલ્મો અને પુસ્તક

મે-જુન-જુલાઈ-૨૦૧૬ની ફિલ્મો અને પુસ્તક

હમણાં લગભગ પાંચેક મહિનાથી ફિલ્મો જોવાનું બંધ છે. જેથી ગયા ત્રણ મહિનામાં એક જ ફિલ્મ જોવાઈ. હવે સપ્ટેમ્બર મહિનાથી રેગ્યુલર ફિલ્મો જોવાનું ચાલુ થશે.

રોમિયો & રાધિકા (૨૦૧૬) : ૩/૧૦

પાલનપુર અને આજુ બાજુના વિસ્તારો (મારી ઓફીસના કેમ્પસમાં)માં જ મોટા ભાગનું શૂટિંગ થયેલું હોવાથી ફિલ્મ બાબતે થોડીક ઉત્સુકતા હતી. તેથી થીયેટરમાંમિત્રો સાથે ફિલ્મ જોવામાં આવી. ફિલ્મના નિર્માતા, દિગ્દર્શક અને ઘણા બધા કલાકારો પાલનપુરના છે તેથી તેમને ફિલ્મમાં ઓળખવામાં છેલ્લે સુધી ફિલ્મ જોવામાં વાંધો ન આવ્યો. પ્રોડક્શન સારું છે. પણ સ્ટોરી અને એક્ટિંગ બાબતે લોચા છે. (અભિષેક જૈનની ફિલ્મોની સરખામણીએ).

જોકે આ ફિલ્મનું શુટિંગ ચાલતું હતું ત્યારે ખ્યાલ આવ્યો હતો કે ફિલ્મ બનાવવી ઘણું અઘરું કામ છે. કાગળ પર સારી લાગતી વાત જયારે સ્ક્રીન પર આવે ત્યાં સુધીમાં ઘણી બધા પરિબળોને લીધે ઘણું બધું બદલાઈ જતું હોય છે. તેથી ઘણીબધી લમણા ઝીંકમાંથી પસાર થઇ થીયેટર સુધી ફિલ્મને લાવતા ફિલ્મ સર્જકોને અભિનંદન આપવા ઘટે.

1467611087-Romeo-and-Radhika

પુસ્તકો:

૧. ટ્રેન ટુ પાકિસ્તાન  (જુન-૨૦૧૬)

લેખક: ખુશવંત સિંહ

ભાગલા દરમ્યાન સરહદ પરના પંજાબના એક ગામ, તેના માણસો અને આજુબાજુના માણસોની વાત કહેતી એક અદભુત કથા. લોકોએ ભાગલા દરમ્યાન શું સહન કરવું પડ્યું હશે, તેમની માનસિક સ્થિતિ કેવી હશે તેનો  આ પુસ્તકના વાંચન દરમ્યાન અંદાજો આવી શકે છે. અંત એકદમ સરસ અને દિલને હલબલાવી નાંખે તેવો છે. આના પર બનેલી ફિલ્મ હવે વિશ લીસ્ટમાં છે.

૨. સાહિત્ય અને સિનેમા (જુલાઈ-૨૦૧૬)

લેખક: જય વસાવડા

સાહિત્ય અને સિનેમાના માંધાતાઓ, કૃતિઓ અને તેને લગતી બીજી બાબતોની રસમય શૈલીમાં વાત કહેતા લેખો. જોકે મોટા ભાગના વાંચેલા હતા પણ ઘણા જુના ૧૯૯૬-૯૭ના લેખો  જે નહોતા વાંચેલા તે વંચાયા અને ખબર પડી કે જયભાઈ તેમની લેખક તરીકેની કેરિયરના શરૂઆતના વર્ષોથી જ પણ ચોટદાર અને વણઉખેડાયેલા વિષયો પર લખતા હતા.

છોટી સી ખુશી -૫…મેઘધનુષ

છોટી સી ખુશી -૫…મેઘધનુષ

તો ગઈ કાલે ચોમાસાની ઋતુમાં વરસાદના થોડા છાંટાઓ અને સાંજના સૂર્યપ્રકાશમાં પાલનપુરમાં સરસ મેઘધનુષ રચાઈ ગયું અને ઘરના આંગણામાં બેઠા બેઠા મોબાઈલનો કેમેરા ક્લિક થઇ ગયો.

RAINBOW 1

RAINBOW 2

 

છોટી સી ખુશી-૪…પાલનપુરના કડી-સમોસા

છોટી સી ખુશી -૪… પાલનપુરના કડી-સમોસા

આખા ગુજરાત કે ભારતમાં સામાન્ય રીતે સમોસાની સાથે લીલી, તીખી અને મીઠી ચટણી પીરસવામાં આવે છે. જયારે પાલનપુરમાં (અને કદાચ રાજસ્થાનમાં)  એક અલગ પ્રકારના કડી સમોસાની વિશેષતા છે. અહી સમોસાની સાથે તીખી કડી (પ્યોર ગુજરાતીમાં ‘કઢી’) આપવામાં આવે છે. જેની સાથે દહીં, તીખી ચટણી અને મીઠી ચટણી મિક્ષ કરીને આપવામાં આવે છે.

આમ તો પાલનપુરમાં ઘણી બધી જગ્યાએ આ નાસ્તો/ફાસ્ટ ફૂડ કે જે કહો તે મળે છે પણ તેમાય ચેતક, સીટી લાઈટ, ભોગીલાલ (શાક માર્કેટ)  અને ગુપ્તાજી (દીલ્હી ગેટ) ની વાત જ કઈ ઓર છે. ગુપ્તાજી ની થોડી વધુ ખારી કડીની ખાસ વિશેષતા છે જે લોકો એક સમોસું લઇ ને બે થી ત્રણ વાર પી જાય છે. અમુક લોકો તો ફક્ત કડી પીવા જ સમોસા ખાવા જાય છે.

KADI SAMOSA

કદાચ બીજા કોઈ શહેર જેટલા જ આ સમોસા સ્વાદીષ્ટ હશે પણ તેની સાથે કડી ભળીને જે સ્વાદ આપે છે તે કદાચ બીજે ક્યાય નહિ મળે. તો પાલનપુરમાં કોઈ આવે તો અને હાયજીન ને નજરઅંદાઝ કરે તો બીજું કાઈ પણ ન ચાખે કે જુએ પણ આ કડી સમોસા તો ચાખવા જ.

મારા મોઢામાં પણ પાણી આવવા લાગ્યું છે. કોમ્પ્યુટર બંધ કરીને મારે પણ કડી સમોસા ખાવા દોડવું પડશે….