છોટી સી ખુશી-૬ …પેન પુરાણ
સરસ પેનથી લખવાનું મને ગમે. સ્કુલમાં હતો ત્યારથી ફાઉન્ટેન પેનથી લખવું તો ખુબ જ ગમે. એ જમાનામાં ફાઉન્ટેન પેનોમાં ‘મયુર’ નો જમાનો હતો જેની બોડી વુડન ટેક્સચર જેવી આવતી.
એ સમયમાં ‘રેનોલ્ડસ’ પેનો નવી નવી માર્કેટમાં આવી હતી અને તેની સફેદ રંગની બોડી અને વાદળી ઢાંકણ વાળી ‘FINE CARBIDE’ પેન જોર ચાલી હતી.
તેની ‘જેટર’ પેન તો પ્રીમીયમ ગણાતી હતી અને મારા જેવાએ તો ૧૨- સાયંસના બોર્ડના પેપરો તેનાથી લખ્યા હતા. તેનો મોરપીંછ કલર મને ખુબ ગમતો.
પછી તો સેલો, ટુડે, લીંક વગેરે ઘણી કંપનીઓ માર્કેટમાં આવી. આ બધામાં ‘રોટોમેક’ (ટેગલાઈન: લીખતે લીખતે લવ હો જાયે) જેવી દેશી કંપનીએ ‘રેનોલ્ડસ’ને સારી એવી ટક્કર આપેલી. તેની ‘ફાઈટર’ પેન ‘જેટર’ ની સીધી સ્પર્ધામાં હતી અને જેની એડમાં જાવેદ અખ્તર આવતા હતા અને જેની પંચ લાઈન ‘ફાઈટર કભી હારતા નહિ’ પ્રખ્યાત બની હતી.
એ સમયમાં ઘણા મિત્રો લક્ઝરની પાઈલોટ પેન લઈને આવતા જે એ સમયમાં ૩૫ રૂ. માં મળતી હતી અને જે વાપરતા હતા તેની મારા જેવા ઈર્ષા કરતા હતા.
મેં પણ તે સમયમાં રમકડાના બદલે ચાઈના પેન તરીકે ઓળખાતી ફાઉન્ટેન પેન લીધી હતી.
પછી તો રોલર પેનો આવી અને ‘એડ’ ની જેલ પેનો આવી અને સાથે સાથે વેરાઈટી પણ વધતી ગઈ.
અત્યારે પેલી ૨ રૂપિયા વાળી યુઝ & થ્રો પેનો પણ ગણી ચાલે છે પણ તે પેનોએ ઘણીવાર ફૂટીને મારા શર્ટ ખરાબ કરેલા છે તેથી તેનાથી હું દુર જ રહું છું. ‘પાર્કર’ જેવી પેનો તો કોઈ ગીફ્ટમાં આપે તો જ લખવી ગમે બાકી તો ઓછી કિમતમાં લખવાની વધારે મજા આવે તેવી પેનો જ પસંદ કરાય છે.
થોડા વર્ષોથી લખવાનું ઓછું થતું જાય છે અને મોટાભાગનું લખવાનું કી-બોર્ડથી જ થાય છે અને આ પેન પુરાણ પણ કી-બોર્ડથી જ લખાયું છે. છતાં ડાયરીમાં લખવા માટે પણ સારી પેનનું વળગણ હજી ઓછું નથી થયું. આ વળગણ અત્યારે મારા પુત્ર આરવને લાગ્યું છે અને તેને દર ૨-૩ દિવસે નવી પેન જોઈએ છે. તેની સાથે ‘અમે સ્કુલના સમયમાં આવી પેનો વાપરતા’ એવી વાતો કરતા કરતા અમારા જમાનાની આ પેનો યાદ આવી.
જોકે હમણાં થોડાક વર્ષોથી ઉપયોગમાં આવતી વિવિધ પેનો જોઉં છું તો એ ધ્યાનમાં આવ્યું છે કે ‘ફ્લેર’ કંપનીની પેનો હમેશા પૈસા વસુલ હોય છે. એક ઉદાહરણ તરીકે ‘ફ્લેર હાઈડ્રા’ નામની જેલ પેન ફક્ત રૂ. ૫ માં આવે છે. વિચારો ફક્ત ૫ રૂ.માં કંપની શું આપી શકે? પણ હાઈડ્રા પેનથી લખતી વખતે ખરેખર આનંદ આવે છે. સરસ મઝાની ગ્રીપ, ગમે તેવો ઇન્કનો બ્લુ કલર, સ્મૂથ લખાણ અને સુંદર બોડી બધું આ ફક્ત ૫ રૂ. ની પેનમાં મળે છે. આ પેનથી લખતી વખતે જે મજા, આનંદ કે સંતોષ જે ગણો તે બીજી અનેક ગણી મોંઘી પેનોથી પણ નથી મળ્યો. બીજી એક પેન છે ‘ફ્લેર ઇઝી ક્લિક’. આ બોલપેન પણ ફક્ત ૫ રૂ. માં મળે છે. હવે તેની બોડીનું ફીનીશીંગ જુઓ, બોડીના કલર જુઓ કે તેની ક્લિક જુઓ, ૫ રૂ. માં પુરેપુરા પૈસા વસુલ. હા, માન્યું કે એકદમ જબરદસ્ત ક્વોલીટી નથી આ પેનોમાં, પણ ૫ રૂ.ની કિમતમાં આ બંને પેનો પૈસા વસુલ છે.
જોકે આ બધી ચર્ચાના અંતમાં તો એટલું જ કે ગમે તેટલી ૫૦૦૦ રૂ. ની પેનથી લખો કે ૫ રૂ.ની પેનથી લખો, છેલ્લે મહત્વ તો લખાણનું જ હોય છે. છતાં ઘણી વાર એવો સવાલ પણ થાય કે મહાન લેખકો કઈ પેનથી લખતા હશે?
તા.ક. : હું કોઈ પેન કંપનીનો એજન્ટ નથી કે મારી સ્ટેશનરીની કોઈ દુકાન નથી.
Shailesh Limbachiya 